Бестеректегі қайғылы оқиға: бір айдан аса уақыт комада жатқан қыз бала көз жұмды
Қайғылы оқиғадан қаза тапқан балалар саны төртеуге жетті
Абай облысының Бестерек ауылында тамыз айында болған жол апатынан кейін тағы бір қыз бала көз жұмды, деп хабарлайды Azattyq Rýhy.
Бүлдіршін бір айдан астам уақыт кома жағдайында болған.
Еске салайық, қайғылы оқиға 19 тамыз күні болған еді. Toyota көлігінің жүргізушісі үй маңында ойнап жүрген балаларды қағып кеткен. Оқиға орнында екі бала көз жұмып, тағы біреуі ауруханаға барар жолда қайтыс болған. Тағы үш бала түрлі жарақат алған.
Президенттің тапсырмасымен жараланғандарға медициналық көмек көрсету үшін оқиға орнына әскери ұшақ жіберілген.
Кейін жағдайы тұрақталған екі бала санитарлық авиация арқылы Астанаға жеткізілді. Қыркүйектің басында дәрігерлер олардың жағдайы қанағаттанарлық екенін және ауруханадан шығаруға дайындалып жатқанын хабарлаған.
Ал ең ауыр жараланған қыз бала алдымен Үржар аудандық ауруханасына, кейін санитарлық тікұшақпен Семей қаласына жеткізілген. Өкінішке қарай, дәрігерлер оның өмірін сақтап қала алмады.
