Кезегін 10 жыл күткен: Тараз әкімдігі жергілікті тұрғынды баспанасыз қалдырмақ болды

Тараз қаласының тұрғыны сот арқылы мемлекеттік тұрғын үй қорынан пәтер алу кезегіне қайта қосылды, деп хабарлайды Azattyq Rýhy.

Облыстық сот мәліметінше, ер адам 2015 жылы «мемлекеттік қызметші» санаты бойынша кезекке тұрған. Алайда 2025 жылы оны «пәтер алған» деген қате мәліметке сүйеніп, кезектен шығарып тастаған. Сот анықтағандай, шын мәнінде оған ешқашан тұрғын үй берілмеген.

Қате мәлімет пен жауапты тұлға

Оны кезектен шығару Тараз қаласы әкімдігінің тұрғын үй қатынастары бөлімі маманының қателігінен болған. Кейін бұл қызметкерге қатысты тәртіптік жаза қолданылды.

Заң нормалары

«Тұрғын үй қатынастары туралы» заңның 73-бабына сәйкес, кезектен шығару тек нақты негіздер болған жағдайда ғана мүмкін. Ал аталған жағдайда мұндай заңды негіздер болмаған.

Сот шешімі

Сот азаматты кезектен шығаруды заңсыз деп танып, оны бастапқы кезекке қоюды міндеттеді. Яғни ол 2015 жылдың ақпанындағы кезек нөмірімен қалпына келтірілді.

Құқықтық мәртебе

Айта кетейік, аталған сот шешімі әзірге заңды күшіне енген жоқ.