Қазақстандағы мектеп асханаларында фастфуд пен газдалған сусын сатқандар жазалана ма

Орталық коммуникациялар қызметінде өткен брифингте мектеп асханаларында фастфуд пен тәтті сусындар сатқаны үшін қандай жаза қолданылатыны белгілі болды. Денсаулық сақтау министрлігінің Санитариялық-эпидемиологиялық бақылау комитеті төрағасының орынбасары Нұрқан Сәдуақасовтың айтуынша, бұл әрекеттерге Әкімшілік құқық бұзушылық туралы кодекстің «Халықтың санитариялық-эпидемиологиялық саламаттылығы саласындағы заңнама талаптарын бұзу» бабы бойынша айыппұл салынады, деп хабарлайды Azattyq Rýhy.

Спикердің айтуынша, аталмыш тағам түрлерін сатқан кәсіпкерлерге заң бойынша мынандай мөлшерде айыппұл қарастырылған:

• жеке тұлғаларға – 30 АЕК (117 960 теңге);
• шағын және орта бизнеске – 230 АЕК (904 360 теңге);
• ірі бизнеске – 1600 АЕК (6,2 млн теңгеден астам).

«Егер шағым түссе, тексеріс жүргізіледі. Заңбұзушылық анықталған жағдайда әкімшілік іс қозғалып, хаттама толтырылады және тиісті шешім шығарылады», – деді Нұрқан Сәдуақасов.

Қандай тағамдарға тыйым салынған

Комитеттің Тағам объектілерін, білім және тәрбие ұйымдарын бақылау басқармасының басшысы Гүлшара Қожатаева да пікір білдірді.

«Хот-дог, гамбургер, пицца, түрлі чипсы... Бұлардың барлығы – зиянды тағамдар. Олардың сатылуына бұрыннан тыйым салынған. Бұл – кәсіпкерлердің жауапкершілігі. Оның үстіне, олар бұл талаптарды біледі. Жаңа ереже енгізілген жоқ», – деді ол.

Жауапсыз жеткізушілерге қатысты шара

Сонымен бірге, егер сот жеткізушінің қызметіне күмән келтірсе, мектеп онымен жасалған келісімшартты бұза алады. Сот шешімінен кейін жеткізушінің деректері Қазақстан Республикасы Оқу-ағарту министрлігінің ресми сайтында жарияланады.