Қостанай облысында білім бөлімі ұстаздардан 15 млн теңге өндіріп алмақ болды

Қостанай облысының Меңдіқара ауданында білім беру бөлімі мектеп директорларының орынбасарларынан 15 млн теңге өндіру туралы сотқа жүгінді, деп хабарлайды Azattyq Rýhy өңірлік сотқа сілтеме жасап.

Іс материалдарына сәйкес, мемлекеттік аудит департаментінің тексерісі 2022 жылдың қаңтарынан 2024 жылдың желтоқсанына дейін аудан мектептерінің лауазымды тұлғаларына артық жұмыс үшін негізсіз ақы төленгенін анықтаған. Жалпы сома 15 млн теңгеден асқан.

Осы деректерге сүйене отырып, заңбұзушылықтарды жою туралы нұсқама беріп, білім бөлімі бюджетке қаражатты қайтару талабы бойынша сотқа жүгінген.

Ал мектеп директорларының орынбасарлары сотта бұл ақыны нақты атқарылған жұмысы үшін жалақы ретінде алғандарын түсіндірді. Айтуларынша, педагогтар жетіспегендіктен артық сағаттар пайда болған, барлық сабақ өткізілген.

«Оқу сағаттары бекітілген. Еңбек міндеттері толық көлемде орындалды, барлық құжат толтырылған. Сабақтар өткізілген, бұл іс материалдарымен расталады», – делінген сот шешімінде.

Білім бөлімі бухгалтериясының басшысы да есептеулер жұмыс уақыты есебі мен мектеп басшыларының бұйрықтарына сәйкес жүргізілгенін растады.

Сот тәртіптік жаза болмағанын және педагогтардың еңбегін ескерді.

«Жауапкерлер өз міндеттерін адал әрі сапалы орындаған, ал жалақы шын мәнінде атқарылған жұмыс үшін төленген», – деп атап өтті сотта.

Нәтижесінде сот білім бөлімінің талабын қанағаттандырудан бас тартты. Шешім әзірге заңды күшіне енген жоқ.