Ыдыс-аяқ қоқыстың арасында жатыр, тазалық жоқ: Алматыда мектеп асханасы елді шошытты

Алматыдағы №65 мектеп-гимназияның асханасының антисанитариялық жағдайы ата-аналардың ашуын туғызды, деп хабарлайды Azattyq Rýhy.

Әлеуметтік желіде асхананың лас күйінде түсірілген фото-видеолар тарады. Онда қоқыс, лас ыдыстар мен көгеріп кеткен табақтар көрсетілген.

«Ас жеткізуге арналған лифтіге ерекше назар аудару керек – ол мақсатты түрде қолданылудың орнына қоқыс жәшігіне айналып кеткен. Астыңғы жағында қоқыс пен лас қалдықтар жатыр, жанында – көгерген ыдыс пен өзге де антисанитария белгілері тұр», – делінген ата-аналардың шағымында.

Ашулы ата-аналар Бостандық ауданы прокуратурасына және санитарлық қызметке жеке кәсіпкердің асхананы қалай жүргізіп отырғанын тексеруді сұрап жүгінген.

Алматы қаласы Білім басқармасы жағдайға қатысты түсініктеме берді:

«№65 мектеп-гимназия» директоры ішкі бақылауды әлсіреткені үшін ҚР Еңбек кодексіне сәйкес тәртіптік жазаға тартылды. Бұл жағдай аудандық СЭС-ке жеткізілді, ыстық тамақпен қамтамасыз етушіге қатысты тиісті шаралар қабылданады», – деп хабарлады ведомство.