Қостанайда бухгалтер бұрынғы көмекшісінен 87 млн теңге өндіріп аламын деп түксіз қалды

Қостанайда ауыл шаруашылығы дақылдарын өсірумен айналысқан компания 2024 жылдың сәуірінде банкрот деп танылды. Банкроттық рәсімі аясында басқарушы 2021 жылғы операцияларға байланысты бұрынғы үш қызметкерден 93 млн теңгеден астам қаражатты бірлесіп өндіріп алу туралы талап түсірді, деп хабарлайды Azattyq Rýhy.

Негіз ретінде ЖШС шотынан қолма-қол ақша алу операциялары көрсетілді. Басқарушының айтуынша, олар алғашқы бухгалтерлік құжаттармен расталмаған.

Алғашқы сот шешімі

Қостанай облысының мамандандырылған экономикалық соты талапты ішінара қанағаттандырды. Екі қызметкердің әрекеттері заңды деп танылып, олар жауапкершіліктен босатылды. Ал бухгалтер көмекшісінен 87 млн теңгеден астам қаражат өндіріп алу туралы шешім шығарылды.

Апелляциядағы жаңа деректер

Қостанай облыстық соты істі қайта қарап, басқа шешім қабылдады.

Сот мәліметінше, бухгалтер көмекшісі ЖШС шотынан 84 млн теңгеден астам соманы шешіп алып, сол күні кассаға қайта енгізген. Бұл факт кассалық кітаппен расталды.

Сондай-ақ сот оның ақшалай операцияларды бас бухгалтердің тапсырмасымен жүргізгенін және қаражаттың толық көлемде ЖШС кассасына түскенін мойындады. Банкроттық басқарушы да кассалық кітаптағы жазбаларды жоққа шығарған жоқ.

3 млн теңге бойынша талаптың мәні

Банктік үзінділерде көрсетілген шамамен 3 млн теңге шын мәнінде алынбағаны анықталып, сот бұл сома бойынша да талапты қанағаттандырудан бас тартты.

Соңғы шешім

Апелляциялық сот төменгі соттың шешімін жойып, бухгалтер көмекшісіне қатысты талапты толығымен қанағаттандырусыз қалдырды.

Бұл шешім заңды күшіне енді.