Астанада Telegram арқылы вейп сатып, 6 млрд теңге табыс тапқандар ұсталды

Астана қаласы бойынша Қаржылық мониторинг агенттігінің департаменті электрондық тұтыну жүйелері (вейптер), хош иістендіргіштер және сұйықтықтардың заңсыз айналымын жүзеге асырған ірі көтерме желінің қызметін тоқтатты, деп хабарлайды Azattyq Rýhy.

Тауар Telegram арқылы бүкіл Қазақстанға таратылған

Тінту барысында анықталғандай, аталған өнімдер Қазақстанның барлық өңіріне Telegram мессенджері және курьерлік жеткізу арқылы жеткізілген.

Жедел-іздестіру іс-шаралары нәтижесінде 5 қойма табылды.

490 мыңнан астам вейп тәркіленді

Тінту кезінде 490 мыңнан астам вейп алынды. Сарапшылардың мәліметінше, олардың сатылымынан түсетін заңсыз табыс 6 млрд теңгеден асуы мүмкін еді.

Қылмыстық табысты заңдастыру схемасы әшкереленді

Күдіктілер қылмыстық жолмен алынған кірістерді жасыру үшін дроперлерді (банктік карталары өз атына рәсімделген адамдарды) пайдаланған.

Ірі сомалар қолма-қол ақшаға айналдырылып, ақшаның ізін жасыру мақсатында түрлі мәмілелер жасалған.

92 млн теңге шетелден кофе жеткізуге жұмсалған

Тергеу деректеріне сай, заңсыз табыстың бір бөлігі шетелден кофе жеткізуге арналған мәмілелерге бағытталып, жалпы сомасы 92 млн теңгеден асқан.

Автокөлікке тыйым салынды, ұйымдастырушылар іздеуде

Сот санкциясымен тыйым салынған өнімдерді тасымалдау үшін пайдаланылған автокөлікке арест қойылды.

Заңсыз бизнестің ұйымдастырушыларына іздеу жарияланды. Олар қамауға алу түріндегі бұлтартпау шарасымен іздестірілуде.

Тергеу жалғасуда

ҚР ҚПК 201-бабына сәйкес, тергеу мүддесіне байланысты өзге ақпарат жарияланбайды.