Астанада Перизат Қайрат ісі бойынша басты сот процесі басталды
Сот отырысына БАҚ өкілдері қатыспайды
Астана қаласының қылмыстық істер жөніндегі ауданаралық сотында қайырымдылық желеуімен жиналған қаражатты жымқырды деген күдікке ілінген Перизат Қайратқа қатысты басты сот талқылауы басталды, деп хабарлайды Azattyq Rýhy.
Сот процесі жабық түрде өтеді
Сот отырысына төрағалық етуші судья Сабыржан Кәрімов сот залында БАҚ өкілдерінің қатысуына тыйым салынғанын хабарлады.
«Айыпталушылардың өтінішіне сәйкес, сот тергеу барысында, оның ішінде айыпталушылар түсініктеме берген кезде және дәлелдемелер зерттелген сәттерде сот процесінің ашықтығын шектеу туралы шешім қабылдады. Өйткені бұл материалдар құпия ақпаратты қамтуы мүмкін. Айыпталушылар кез келген сәтте түсініктеме беруге құқылы. Сол себепті сот әр жолы үзіліс жариялап, процесс қатысушысы болып саналмайтын тұлғалар мен журналистерді залдан шығарып, кейін қайта кіргізуге мәжбүр болады», – деді судья.
Алдын ала тыңдалымда Перизат Қайраттың қамауда соққыға жығылғаны айтылды
Бұған дейін, 9 шілде күні, Астанада Перизат Қайрат пен оның анасы Ғайни Алашбаеваға қатысты алдын ала сот тыңдалымы өткен болатын. Тыңдалым барысында Перизат Қайрат тергеу изоляторында өзін қызметкерлердің ұрып-соққанын мәлімдеді.
Осыған қатысты Астана қалалық Полиция департаменті түсініктеме беріп, видеосын жариялаған болатын.
