Семейде ассенизатор жүргізушісі әйел адамды қағып өлтірді (ВИДЕО)

Семей қаласында ассенизатор көлігінің жүргізушісі жаяу жүргіншіні қағып өлтірді, деп хабарлайды Azattyq Rýhy.

Абай облысы Полиция департаменті қайғылы оқиғаны ресми түрде растады.

Қайғылы оқиға жаяу жүргіншілер өткелінде болған

Абай облысы ПД мәліметінше, 2025 жылғы 23 маусым күні сағат 11:00 шамасында Семей қаласының Морозов көшесіндегі реттелмейтін жаяу жүргіншілер өткелінде жол-көлік оқиғасы тіркелген.

«Алдын ала мәлімет бойынша, 45 жастағы «ЗИЛ ММЗ-4502» көлігінің жүргізушісі, Шевченко көшесіне бағыт алып келе жатып, 35 жастағы әйелді қағып кеткен. Жәбірленуші оқиға орнында көз жұмды», – делінген полиция мәліметінде.

Жүк көлігі аударылып, бетон бағананы бұзып кетті

Оқиға орнынан түсірілген видео Instagram желісіндегі zello_semey2 паблигінде жарияланды. Кадрда аударылып жатқан жүк көлігі, сондай-ақ қираған бетон бағана анық көрінеді.

ЗИЛ көлігін көтеру үшін арнайы автокран жұмылдырылған.

Қылмыстық іс қозғалды, сараптамалар тағайындалды

Аталған факті бойынша ҚР Қылмыстық кодексінің 345-бабы 3-бөлігі («Көлік құралын жүргізу ережесін бұзу, абайсызда адам өліміне әкеп соққан») бойынша сотқа дейінгі тергеу басталды.

Қазіргі таңда, сот-медициналық және көлік-техникалық сараптамалар тағайындалған. Тергеу нәтижесіне байланысты процессуалдық шешім қабылданатын болады

Полиция жолда абай болуға шақырады

Құқық қорғау органдары жүргізушілерді де, жаяу жүргіншілерді де жолда барынша сақтық пен мұқияттылық танытуға шақырады.