Алматыда Сайран көліне бір күнде екі адам батып кетті (ВИДЕО)

Алматы қаласындағы Сайран көліне екі адам – жасөспірім мен ересек ер адам батып кетті. Қайғылы оқиғаны Төтенше жағдайлар департаменті растады, деп хабарлайды Azattyq Rýhy.

Алғашқы оқиға: суға батқан жасөспірімнің денесі табылды

Куәгерлердің хабарламасынан кейін 109 қызметіне қоңырау шалынған. Оқиға орнына дереу водолаздар жіберіліп, олар 2007 жылы туған жасөспірімнің денесін судан алып шықты.

«Қайғылы оқиға «Шомылуға тыйым салынған» белгісі орнатылған жерде болды», – деп мәлімдеді ТЖД.

Сайран көлі – ресми шомылуға арналмаған

Мамандардың айтуынша, Сайран көлі әлі ресми түрде пайдалануға берілмеген. Онда абаттандыру жұмысы жалғасып жатыр. Соған қарамастан, жүзуге тырысатындар аз емес.

Кешкісін тағы бір адам көз жұмды

Кешке екінші қайғылы оқиға тіркелді. Водолаздар 1977 жылы туған ер адамның денесін судан алып шықты.

Куәгерлердің айтуынша, ер адам мас күйде суға түскен, бірақ қайтып шыға алмаған.

ТЖД ескертуі: рұқсат етілмеген жерде суға түсу – қауіпті

Төтенше жағдайлар департаменті азаматтарды рұқсат етілмеген су айдындарында шомылмауға шақырады. Мұндай әрекеттер қайғылы жағдайларға әкелуі мүмкін.