Ресейге кіру тәртібі өзгереді: елшілік қазақстандықтарға үндеу жасады

2025 жылғы 30 маусымнан бастап 2026 жылғы 30 маусымға дейін Ресей Федерациясының мемлекеттік шекарасындағы өткізу бекеттерінде шетел азаматтары мен азаматтығы жоқ тұлғалардың елге кіруі мен шығуы бойынша жаңа ережелерді сынақтан өткізу жобасы іске қосылады, деп хабарлайды Azattyq Rýhy.

Жаңа тәртіпке сәйкес, визасыз режим аясында Ресейге баруды жоспарлаған шетел азаматтарына «ruID» мобильді қосымшасы арқылы алдын ала тіркеуден өту ұсынылады. Бұл қадам міндетті емес, бірақ электронды өтінішті толтыру шетел азаматтарына бірқатар артықшылық береді.

Жаңа ереже Қазақстан азаматтарына қалай әсер етеді?

Қазақстан мен Ресей арасындағы визасыз қатынас тәртібі өзгермейді. «ruID» қосымшасы арқылы өтініш беру – ерікті сипатта. Алайда ресейлік мемлекеттік қызметтерге, ұялы байланыс операторларының қызметтеріне және төлем жүйелеріне оңай қол жеткізу үшін қосымшаны пайдалану ұсынылады.

Қосымшамен тіркелу тәртібі

Өтініш жоспарланған сапардан 90 күн бұрын немесе сапарға дейін кемінде 72 сағат қалғанда берілуі тиіс.

Аса маңызды жағдайларда (мысалы, туыстың қайтыс болуы) өтініш 4 сағат ішінде қабылданады.

Өтініште бару мақсаты, сапар мерзімі, елден шығу деректері, балалар туралы мәліметтер көрсетіледі.

Қосымшада биометрикалық мәліметтер: бет-әлпет суреті, паспорт және дауыс жазбасы ұсынылады.

Ресейге кіргеннен кейін не істеу керек?

Шекарадан өткен соң 10 күн ішінде жалпы биометрикалық жүйеге (ЕБС) тіркелу қажет. Бұл үшін жақын орналасқан банктің бөлімшесіне барып, жеке бас құжаттарын көрсету қажет.

Сондай-ақ, ресейлік «Госуслуги» порталында аккаунтты растау үшін көпфункционалды орталықтарға (МФЦ) бару ұсынылады.

Бұл арқылы:

• мемлекеттік қызметтерді онлайн алуға;
• ресейлік SIM-карта рәсімдеуге;
• айыппұлдар мен алымдарды төлеуге болады.