Опера әншісі Әйгерім Алтынбек «Ла Скала» академиясында тағылымдамадан өтеді

Қазақстандық опера әншісі Әйгерім Алтынбек әлемдегі ең беделді опера өнері оқу орындарының бірі – Италияның «Ла Скала» театры жанындағы академияда тағылымдамадан өтетін болды, деп хабарлайды Azattyq Rýhy.
Мәдениет және ақпарат министрлігінің мәліметінше, ол бейнежазба арқылы өткен алдын ала іріктеуде 400-ден астам үміткердің арасынан өтіп, үздік 12 орындаушының қатарына енген.

Халықаралық байқаулардың жүлдегері

Әйгерім Алтынбек – халықаралық вокалдық байқаулардың бірнеше мәрте лауреаты. Ол:

• Джакомо Пуччинидің 100 жылдығына орай ұйымдастырылған халықаралық опера әншілері байқауында жеңімпаз атанды;
• Италияның Модена қаласында өткен Николай Гяуров атындағы опера әншілері байқауында үшінші орын алды;
• Атақты опера жұлдызы Мирелла Френидің арнайы сыйлығына ие болды;
• Рената Тебальди атындағы халықаралық вокал конкурсында (470 қатысушы) екінші орынға қол жеткізді.

Әйгілі Хосе Каррерас пен Андреа Бочеллимен бір сахнада

• 25 маусымда әлемге әйгілі тенор Хосе Каррерастың концертінде өнер көрсетеді. Кеште әйгілі опера ариялары мен дуэттер орындалады.

• 27-28 маусым күндері Италияның Неаполь қаласында өтетін Андреа Бочеллидің мерейтойлық концертінде де өнер көрсетіп, аты аңызға айналған тенормен бір сахнада ән шырқайды.

Бұл – кәсіби шеберлік пен мемлекеттік қолдаудың нәтижесі

«Әйгерім Алтынбектің бұл жетістігі – оның таланты мен табандылығының, білімге деген ұмтылысы мен кәсіби шеберлігінің жемісі. Сонымен қатар, бұл – Қазақстанда жас дарындарды қолдауға бағытталған мемлекеттік бағдарламалар мен мүмкіндіктердің нақты нәтижесі», - делінген Мәдениет және ақпарат министрлігінің хабарламасында.