Бүлдіршінді зорлап, өмір бойына сотталған педофил үкімді өзгертуді талап етті

Қазақстан Республикасы Жоғарғы Сотының қылмыстық істер жөніндегі сот алқасы Асанәлі Мерғалиевтің төрағалығымен, Бас прокурордың орынбасары Асқар Шыңдалиев пен қорғаушы Н. Қамыспайдың қатысуымен, балаға қатысты сексуалдық сипаттағы аса ауыр қылмыс жасағаны үшін өмір бойына бас бостандығынан айырылған қылмыскердің ісі бойынша кассациялық шағымды қарады, деп хабарлайды Azattyq Rýhy.

Іс бойынша мән-жайлар

Қазақстан Республикасы Жоғарғы Сотының баспасөз қызметі хабарлағандай:

«К. алкогольдік масаң күйде болып, күш қолдану арқылы және сол күш қолданамын деп қорқытып, 2018 жылы туған балаға қатысты сексуалдық сипаттағы әрекеттер жасаған».

К.-ның кінәсі мынадай дәлелдермен толық дәлелденген:

• Жәбірленуші мен оның заңды өкілінің айғақты жауаптары;
• Бейнебақылау камерасынан алынған жазба;
• Сот-медициналық және психологиялық сараптамалардың қорытындылары.

Сот шешімі

К.-ға жаза тағайындау кезінде мына жайттар ауырлататын жағдай ретінде ескерілді:

• Жасалған қылмыстың аса ауырлығы;
• Жеңілдететін мән-жайлардың болмауы;
• Қылмыстың алкогольдік мас күйде жасалғаны.

Осыған байланысты сот оған өмір бойына бас бостандығынан айыру жазасын тағайындады.

Жоғарғы Соттың кассациялық сатысы бұрынғы сот шешімдерін өзгеріссіз қалдырды.

Сотталушының процестегі қатысуы бейнебайланыс арқылы қамтамасыз етілді.