Бейнеудегі оқушылардың жаппай улануы: асхана қызметкерлері медициналық тексеруден өтпеген

Маңғыстау облысының Бейнеу ауылындағы мектеп оқушыларының жаппай улануынан кейін жүргізілген тексеріс нәтижесінде асхана қызметкерлерінің бірінен стафилококк бактериясы табылды, деп хабарлайды Azattyq Rýhy Lada.kz-ке сілтеме жасап.

Облыстық санитариялық-эпидемиологиялық бақылау департаментінің басшысы Мұхтар Сербаевтың мәліметінше, орта мектептегі тағам блогына жүргізілген зерттеу барысында 10 қызметкердің бірі стафилококк тасымалдаушысы екені анықталған. Сондай-ақ, екі қызметкер міндетті медициналық тексеруден уақытында өтпеген.

«Лабораториялық сараптамалар дайын тағамдардың 6 үлгісінен зиянды бактерияларанықтаған. Сонымен қатар, қоймаларды мақсатсыз пайдалану фактілері тіркелген — мысалы, көкөністерге арналған қоймада астық дақылдары сақталған», — дедінген хабарламада.

Тағы бір маңызды бұзушылық — тоғыз түрлі беткейлік сынамадан ішек таяқшалары тобына жататын бактериялар табылған. Мамандардың айтуынша, асханада уақытылы ылғалды тазалау жүргізілмеген, қабырғаларда жарықтар болған — мұның бәрі санитарлық талаптарға қайшы.

«Барлық материалдар полицияға жолданды. Қазір сотқа дейінгі тергеу амалдарын бастау туралы шешім қабылданады. Асхана уақытша жабылды, оқушылар сабақты жалғастыруда»,— деді Мұхтар Сербаев.

Еске салайық, 3 сәуір күні Бейнеу ауылындағы жалпы білім беретін мектептің оқушылары улану белгілерімен ауруханаға түскен еді. Санэпидбақылау мамандары шұғыл түрде мектеп асханасынан сынамалар алып, тексеріс бастаған болатын.