«Жазамды алуға дайынмын»: экс-сүйіктісін соққыға жыққан актер Серік Шәріп кешірім сұрады (ВИДЕО)

Танымал отандық актер Серік Шәріп экс-сүйіктісімен болған жағдайға қатысты пікір білдіріп, кешірім сұрады, деп хабарлайды Azattyq Rýhy.

Ол өз сөзінде жасаған ісіне өкінетінін ерекше айтып өтті.

«Мен зорлық-зомбылыққа қарсымын. Өкінішке қарай, лифтіден Әлия Бутееваны қатты күшпен шығарып алған видеоны бәріңіз көрдіңіздер. Өз ісімді ақтамаймын. Мен зұлымдық жасадым және заң аясында барлық жазамды алуға дайынмын. Ұрыс-керіс кезіндегі ашу-ыза бәрімізге таныс деп ойлаймын, бірақ менің қателігімді қайталамаңыздар. Мен Әлияның бетінен ұрып жібердім. Осы үшін мен одан, оның отбасынан және менің теріс қылығым әсер еткендердің барлығынан кешірім сұраймын», - деді актер.

Айта кетейік, осыған дейін Серік Шәріптің бұрынғы сүйіктісі Әлия Бутеева актердің өзін соққыға жыққаны туралы айтқан болатын. Сол сияқты актер ірі медиакомпанияның қара тізіміне енді.

Ал оның бұл әрекетіне қатысты актердің бұрынғы жұбайы, танымал рэпер Say Mo (аты-жөні – Мөлдір Есембек) пікір білдіріп, бірнеше жыл бұрын өзі де осындай жағдайға тап болғанын айтқан.