Еуро-2025: Қазақстанның жасөспірімдер құрамасы іріктеу кезеңінде топ жеңімпазы атанды
Олар Литва командасын 5:2 есебімен жеңді
Қазақстанның 17 жасқа дейінгі жасөспірімдер құрамасы Литва командасын 5:2 есебімен жеңіп, 2025 жылғы Еуропа чемпионатының іріктеу кезеңіндегі тобында бірінші орынға шықты, деп хабарлайды Azattyq Rýhy Қазақстанның футбол федерациясының баспасөз қызметіне сілтеме жасап.
Ойын қазақстандық футболшылардың айқын басымдығымен өтті. Кездесудің басты қаһарманы Исмайыл Бекболат болды – ол хет-трик жасап, командасының жеңісіне үлкен үлес қосты. Сонымен қатар, Абылай Төлеухан мен Дәулет Орынбасар да бір-бір голдан соғып, есепті еселей түсті.
Бұл жеңістің арқасында Қазақстан U-17 құрамасы іріктеу кезеңінің топтық кезеңін сәтті аяқтап, барлық матчта жеңіске жетті. Енді жас футболшылар турнирдің келесі кезеңіне дайындықты бастайды.
