Қазақстанда жаңа медициналық авиация ұшақтары пайда болады
Тозған техника жаңа медициналық тікұшақтармен алмастырылады
Қазақстанда жаңа медициналық авиация ұшақтары пайда болады. Бұл туралы денсаулық сақтау министрі Ақмарал Әлназарова жазды, деп хабарлайды Azattyq Rýhy.
«Бүгін еліміздің ең шалғай түкпірлерінің тұрғындары үшін шұғыл медициналық көмекті қауіпсіз әрі қолжетімді етуге мүмкіндік беретін маңызды жаңалықпен бөліскім келеді. Біз ескі медициналық авиация ұшақтарын жаңа, заманауи және тиімдірек ұшақтарға ауыстыру процесін бастаймыз. Бүгін «Еурокоптер Қазақстан инжиниринг» зауытының өндірістік алаңында медициналық авиацияны дамыту және әуе кемелері паркін жаңарту перспективаларын талқыладық», — деп жазды министр.
Оның сөзінше, «Airbus Helicopters Kazakhstan Engineering» бас директоры Себастьян Ксавье Джонатан кәсіпорынның медициналық авиация қызметтерін көрсету үшін жаңа H125 тікұшақтарын жеткізу мүмкіндіктері туралы айтып берді.
«Жоспарланған әріптестік шеңберінде инвестициялар туралы келісім шарттарында біз тозған техниканы жаңа медициналық тікұшақтармен алмастыра аламыз. Бұл, ең алдымен, біздің пациенттер мен медицина персоналы үшін ұшу қауіпсіздігін қамтамасыз етеді, сондай-ақ борттарда медициналық көмек көрсету үшін барынша қолайлы жағдайлар жасау да маңызды. Сапар барысында Alaman Air әуекомпаниясына тиесілі екі медициналық модулмен жабдықталған Bombardier CRJ-200 турбореактивті мамандандырылған ұшағын қарадым. Қазіргі заманғы борт ҚР бүкіл аумағы бойынша өңіраралық тоқтаусыз рейстерді, сондай-ақ ҚР пациент-азаматтарын шетелдік клиникалардан тасымалдау бойынша халықаралық рейстерді орындауға арналған», — деді ол.
Министр медициналық авиация бұл жай ғана технология емес, бұл өмірді сақтап қалу екенінайтты. Ол шұғыл жағдайларда пациенттерді жедел жеткізуді қамтамасыз етеді, қан компоненттерін, трансплантаттау үшін ағзаларды тасымалдауға көмектеседі, сондай-ақ елдің ең шалғай түкпірлеріндегі медициналық көмекті қолдайды.
«Санитариялық авиация бригадаларының құрамында жұмыс істейтін дәрігерлеріміз өткен жылы 2 мыңнан астам ұшуды орындады. Әуеге көтерілгенде, олардың өмірлеріне қауіп төнбеуі керек. Біздің міндетіміз - оларға кәсіби борышты орындау кезінде толық қауіпсіздікті қамтамасыз ету болып табылады», — деді ол.
