Жезқазғанда мұнай базасында өрт болды: зардап шеккендер бар
Жалпы үш автокөлік өртенген
Жезқазған қаласындағы мұнай базасында өрт шығып, арнайы мақсаттағы үш автокөлік өртенді, деп хабарлайды Azattyq Rýhy ҚР Төтенше жағдайлар министрлігінің баспасөз қызметіне сілтеме жасап.
«Өрт кезінде газ-ауа қоспасы жарылып, ангар құлап түскен. Өрт шыққаннан кейін ТЖМ бөлімшелері оқиға орнына санаулы минутта жеткен. Оқиға орнында құрылған жедел штаб жанғыш отынға толы резервуарды қорғау және оны салқындату бойынша шұғыл шешім қабылдады. Өрт сөндірушілер автоцистерналарды өрт сөндіру гидранттарына орналастырып, көбікті қолдану арқылы 100 шаршы метр аумақтағы өртті сөндірді», — деп жазылған хабарламада.
Өрт салдарынан мұнай базасының төрт қызметкері жарақат алып, ауруханаға жатқызылды. Өрттің шығу себебі анықталып жатыр.
