Әкімнің қызметінен босатылуы мен мұғалім оқиғасының бір біріне қатысы жоқ – Семей әкімдігі

Кеше Семей қаласында жаңа әкім тағайындалды. Экс-әкім Нұрбол Нұрсағатов 2,5 жылдан кейін қызметінен кететінін мәлімдеді. Бұл өзгеріс қоғамда жуырда мектеп мұғалімінің шырша әрлеу барысында құлау оқиғасымен байланыстырылды. Әкімдік осыған қатысты мәлімдеме жасады, деп хабарлайды Azattyq Rýhy.

Нұрбол Нұрсағатов жұмысынан кететінін желтоқсанның 23-і күні мұғалімнің оқиғасынан кейін бір-екі күн өткен соң мәлімдеді. Педагог 4-5 метр биіктен құлап, ауыр жарақат алған.

Қала әкімдігі тағайындау мен мұғалім оқиғасының бір-біріне еш қатысы жоқ деп хабарлады.

«Шыршадан құлап жарақат алған мұғалімнің оқиғасы Нұрбол Төлегенұлы Нұрсағатовтың қызметінен босатылуына еш қатысы жоқ. Ол оқиғадан бір апта бұрын өз еркімен жұмысынан кету туралы өтініш берген», - деп хабарлады Семей әкімдігі.

Сондай-ақ, ведомство қасақана жалған ақпарат таратқаны үшін жауапкершілікті ескертті.

Айта кетейік, оқиға өткен демалыс күндері болған. Жаңа жылдық шыршаны безендіруге атсалысқан ұстаздардың бірі жарақат алып, ауруханаға түсті. Тергеуден кейін мектеп директорларына қатаң сөгіс жарияланып, қалалық білім бөлімінің басшысы қызметінен босатылды.