Маңғыстау облысында балалар арасындағы туберкулез екі есе артқан
Бұл диаскинтест әдісімен тексеру көлемінің ұлғаюымен байланысты
Маңғыстау облысында биыл балалар арасында туберкулез ауруының көрсеткіші екі есе өскен. Бұл туралы облыстық фтизиопульмонология орталығының мәліметіне сүйене отырып Lada.kz жазды, деп хабарлайды Azattyq Rýhy.
«Соңғы онжылдықта Маңғыстау облысында туберкулезбен ауру және одан өлім-жітім көрсеткіші тұрақты төмендеуде болған. Мәселен, 2014 жылы туберкулезбен ауру көрсеткіші әр 100 мың адамға шаққанда 71,2 болса, 2023 жылы бұл көрсеткіш 31,8-ге дейін төмендеген. Бұл – 55,3% азайғанын білдіреді. Сол сияқты өлім көрсеткіші 2014 жылы әр 100 мың адамға 5,4 болса, 2023 жылы бұл көрсеткіш 0,8-ге дейін төмендеген, яғни 85,2% төмендеген», — деп жазады басылым.
2024 жылдың алғашқы 10 айында өңірде жалпы туберкулез ауруының көрсеткіші әр 100 мың адамға 30,0 болды. Бұл өткен жылдың сәйкес кезеңімен салыстырғанда 7,9%-ға жоғары.
«Балалар (0-17 жас) арасындағы туберкулезбен ауру көрсеткіші 2023 жылғы 6,9-дан биыл 14,6-ға дейін өсті. Бұл 111,6%-ға артып, нақты саны бойынша 26 жағдайға көбейген немесе 2,2 есеге өскен», — деп жазылған материалда.
Орталықтың хабарлауынша, балалар арасындағы туберкулез ауруының көбеюі диаскинтест әдісімен тексеру көлемінің ұлғаюымен байланысты. 2024 жылдың 10 айындағы жоспар 185,5%-ға орындалған. Мектеп жасындағы балаларға Манту сынамасы, ал 15 жастан асқан балаларға флюорографиялық тексеру жүргізілген.
