Полиция қызметкеріне 3 мың теңге пара ұсынбақ болған тұрғын жазаланады

Қостанай облысының тұрғыны полицейге заңсыз ақша ұсынғаны үшін қылмыстық жауапқа тартылады, деп хабарлайды Azattyq Rýhy облыстық прокуратураның ақпаратына сілтеме жасап.

Тұрғын көлігінің габариттік шамдары істен шыққан күйде жүргізіп келе жатқан. Бұл ереже бұзушылықты жол полициясының қызметкері анықтап, оған әкімшілік хаттама толтырған.

«Жүргізуші әкімшілік жауапқа тартылмас үшін полиция қызметкеріне 3 мың теңге ұсынбақ болған. Полицей оған бұл әрекеттің заңсыз екенін және қылмыстық жауапкершілік қарастырылғанын түсіндірген. Алайда, жүргізуші сөзді елемей, ақшаны көлік панеліне қойған», — деп жазылған хабарламада.

Прокуратураның мәліметінше, ауыл тұрғынына қатысты ҚР Қылмыстық кодексінің 24-бабы 3-бөлігі және 367-бабы 1-бөлігі бойынша іс қозғалды. Бұл баптар мемлекеттік қызметкерге пара беруге әрекет жасағаны үшін қылмыстық жауапкершілікті қарастырады. Сот оның кінәсін дәлелдесе, ол бес жылға дейін бас бостандығынан айырылуы мүмкін.