Мал іздеуге шығып, жоғалып кеткен тұрғын бес күн бойы табылмай жатыр

Қостанай облысында мал іздеуге шыққан ауыл тұрғыны бес күннен бері табылмай жатыр, деп хабарлайды Azattyq Rýhy облыстық ТЖ департаментіне сілтеме жасап.

«Карабалық ауданына қарасты Славенка ауылынан 5 шақырым жердегі шаруа қожалығында 1987 жылы туған ер адам мал іздеуге шығып, байланысқа шықпай қалған. Алаңдаған жұмыс беруші полицияға жүгінді», – деп мәлімдеді Төтенше жағдайлар министрлігі.

Іздеу жұмыстары 5 қарашадан бері жалғасып жатыр. Жұмысқа құтқарушылар, полиция қызметкерлері, жергілікті атқарушы органдар, шекара қызметі, еріктілер, кинологиялық есеп және пилотсыз ұшақ тартылған.

Департамент өкілдері тұрғындарға күзгі-қысқы ауа райының тұрақсыз жағдайында қауіпсіздік шараларын сақтау керек екенін еске салды.