Дәретханаға құлап, көз жұмған бүлдіршіннің өліміне қатысты тың дерек: күдікті қолға түсті
Журналистің айтуынша, күдікті де көпке ұзамай қолға түскен
Осыдан 3 ай бұрын көршінің дәретханасына түсіп қайтыс болды деген 3 жасар Асылым адам қолынан қаза тауыпты. Бұл туралы журналист Гүлмира Әбіқай Facebook парақшасында жазды, деп хабарлайды Azattyq Rýhy.
Журналистің айтуынша, Түркістан облысының шағын ғана Сіргелі ауылында бәрі бір-бірін жақсы таниды.
«Мамыр айының ортасында таңғы 9-да 3 жастан асқан Асылым ұшты-күйлі жоқ болды. Әдеттегідей аулада, ары кетсе көршінің қызымен ойнайтын бүлдіршіннен не із, не сыбыс жоқ. Аттай 3 күн ата-анасы, туғандары, бүкіл ауыл мен еріктілер аяғынан тік тұрды. Полиция мен әскер тартылды. Ауылдағы бүкіл тесік-шұңқыр қаралды. Түк із жоқ. Сөйткен бүлдіршін көрші үйдің туалетінен табылды. Дәретханада 3 жасар қыздың денесі 3 тәулік бойы жатқанын үй иелері қалай байқамаған?
Сарыағаштық сот мед.сараптама, қыз таза, тек беті сырылған, артынан соққы алған. Бұл соққы дәретхана тесігіне ұрылғаннан болды. Асылым туалетке өзі түсіп кеткен деп көрсетті.
Алланың салғанына қарсы шара бар ма деп, егіліп ата-анасы қалды. Арада ай өтіп, Асылымның қырқына дайындалып жатқанда көршілес үйдің тағы бір қызы туалетке құлай жаздап, құтқарып қалыпты. Кішкентай қыздарды қинап, өлтіріп, дәретханаға лақтырып жүрген ересек адам бар деген сөз Сіргеліде желдей есті. Бір ажалдан аман қалған 5 жасар қыз Нұрай өзін кім қорқытқанын, қайда шақырғанын, буындырып ұрғанын бәрін айтып берді. Қыздың көйлегінің ұшын көріп қалған (ол да көрші) 7-сынып оқушысы мұнда не болып жатыр деп алып шыққан», - дейді Гүлмира Әбіқай.
Ол сөзін жалғай отырып, осыдан кейін іс қайта қозғалып, тергеу басталып кеткен. Журналистің айтуынша, күдікті де көпке ұзамай қолға түскен.
«Нұрайдың айтқанының бәрі рас болды. Асылымның үйіне 40 жыл қарама-қарсы тұрған көршінің қызы қандықол қылмыскер болып шықты. 16 жаста (атын Жанира деп қояйық), бәрін мойындады. Тергеу Жанираны ауытқуы бар шизофрения деп тапты. Сонда 9 сынып бойы ауылдағы орта мектепте бәрімен бірге оқыған қыз аяқ астынан қалай ауру болып қалады???
Қазір періште Асылымның ата-анасына қиын тиюде. 40 жыл арасын көше бөлген аралас-құралас, жақын туыс болып кеткен көршінің үйіне қараса жүрегі сыздайды. Оларды көрмеу, бетпе-бет кездеспеу мүмкін емес!
Бүкіл ауыл бұл отбасының бір түнде өзге жаққа көшіп кетуін талап етуде», - деп жазды журналист Facebook парақшасында.
Айта кетейік, Түркістан облысында жоғалып кеткен бүлдіршіннің мәйіті дәретхана шұңқырынан табылғаны осыған дейін хабарланған.