Жетісу облысында қар құрсауында қалған 60 адам құтқарылды

Жетісулық жолшылар 60 жолаушысы бар 50 көлікті қар құрсауынан алып шықты, деп хабарлайды Azattyq Ruhy.

«Соңғы екі күнде жол қызметкерлері республикалық маңызы бар А-355 «Үшарал – Достық» автожолында қар құрсауында қалған 50 көлікті құтқарды. Құтқарылған көліктерде 60 жолаушы болған, оның ішінде балалар мен шетел азаматтары да бар», - делінген «ҚазАвтоЖол» хабарламасында.

Жетісу өңірінде тұрақсыз ауа райы байқалады, қалың қар жауып, боран соғып тұр, салдарынан көрініс шектелген. Түнгі уақытта аяз -35 градусқа дейін жетуде.

Барлық жол қызметкерлері күшейтілген жұмыс режиміне көшірілді.

Ауа райының қолайсыздығына байланысты аталмыш өңірде көліктің барлық түрлері үшін уақытша қозғалысқа шектеу енгізілді.