Түркістанда ер адам тұрғындарды алдап, банк карталарынан ақша шешіп алған
Жәбірленушілерге 243 мың теңге шығын келген
Түркістанда тұрғындарды алдап, олардың банк карталарынан ақша шешіп алған ер адамды полиция ұстады, деп хабарлайды Azattyq Rýhy.
Полицияға 4 тұрғыннан арыз келіп түсті. Олардың айтуынша, банкоматтың алдында белгісіз азамат ақшаларын шешіп беремін деп, жасырын түрде «сіздің есеп шотыңызда ақша қаражаты қалмады» деп алаяқтық жолмен ақшаларын шешіп алған. Жәбірленушілерге 243 000 теңге шығын келген.
Полицейлер 37 жастағы ер адамның жеке-басын анықтады. Ол жұмыссыз жергілікті тұрғын болып шықты.
«Тергеу барысында полиция қызметкерлері ұсталған ер адамның тұрғындардан алдау жолымен алған ақшаны өзінің қажеттілігіне жаратып жібергені белгілі болды», - делінген ақпаратта.
Күдікті ер адамға қатысты алаяқтық бабымен сотқа дейінгі тергеу амалдары жүргізіліп, іс сотқа жолданды.
