Петропавлда жарылғыш зат туралы жалған хабар берген мас ер адам қамауға алынды
Ол осыған дейін де қоғамдық жерде мас күйде жүргені үшін әкімшілік жауапкершілікке тартылған
Петропавлда жарылғыш зат туралы жалған хабар беріп, арнайы дүрліктірген ер адам қамауға алынды. Бұл туралы СҚО ПД баспасөз қызметі мәлім етті, деп хабарлайды Azattyq Rýhy.
Департаменттің мәліметінше, 23 қаңтарға қараған түні «102» арнасына Петропавлдағы Қазақстан Конституциясы көшесіндегі үйлердің бірінің пәтерінде жарылғыш зат қойылғаны туралы қоңырау түсті. Дабыл сигналы бойынша оқиға орнына кезекші жедел-тергеу тобы, жарғыш техниктер, жылдам қимылдайтын арнайы жасақтың, патрульдік полиция батальонының және басқа да мүдделі қызметтер мен мемлекеттік органдардың қызметкерлері жетті. Тексеру нәтижесінде жарылғыш құрылғы табылмады.
Жалған хабарлама жасады деген күдікпен 35 жастағы Петропавл тұрғыны анықталып, ұсталды. Мас ер адам үйдің кіреберісінде ұсталды.
Ол осыған дейін де қоғамдық жерде мас күйде жүргені үшін әкімшілік жауапкершілікке тартылған. Жазаға бір өте қоймаған. Құқық бұзушылықты қайталағаны үшін әкімшілік қамаққа алынды.
«Әкімшілік жазасын өтеп шыққан соң ҚР Қылмыстық кодексінің 273-бабы «Терроризм актiсi туралы көрiнеу жалған хабарлау» бойынша қылмыстық жауапкершілікке тартылады. Баптың санкциясына сәйкес, 5 мың айлық есептік көрсеткішке дейін ірі көлемдегі айыппұл төлейді немесе 5 жылға дейінгі мерзімге бас бостандығынан айырылуы мүмкін», - дейді СҚО ПД экстремизмаге қарсы іс-қимыл басқармасының қызметкерлері.
