Қазақстандық мектептерде алғашқы электронды кітапхана жүйесі енгізілді

Жаңа жыл қарсаңында Қазақстанның бағдарламашылары еліміздің барлық оқушыларына үлкен сый жасады. Қазақстандық мектептерде кітапхана қорының толық циклдерін қамтамасыз ететін «Qazaq mura» бірегей жүйесі іске қосылды, деп хабарлайды Azattyq Ruhy.

«Qazaq mura» әсіресе, әдебиетке қол жетімділігі шектеулі аймақтардағы кітапхана жұмысын біршама оңтайландырмақ.  Платформа Ұлттық кітап палатасымен интеграцияланған. Ол ауқымды кітап қорына тегін әрі шектеусіз қол жеткізуге мүмкіндік беріп қана қоймай, барлық мектептерден ақпарат жинап, нақты деректі де ұсынады.

Білім беру мен цифрлық инновацияларды дамытудағы мұндай жаңа қадам қазақстандық бағдарламашылардың арқасында мүмкін болды. Платформаны әзірлеушілер тобының жетекшісі Мұқатай Мәліктің айтуынша, бұл сандық кітапхана жүйесін дайындауға 3 жылдан астам уақыт жұмсалған.

«Кітапхана саласын цифрландыру қазіргі білім берудегі заманауи бағыт болып табылады. Бүгінгі таңда елімізде кітапхана қоры туралы толық ақпарат жоқ. Сондықтан Қазақстанның мектеп кітапханаларының жұмысын цифрландыру мен автоматтандыруға байланысты бірқатар іс-шараларды іске асыру бойынша жұмыстар қолға алынды. Яғни, кітапханашылар ғана емес, оқырмандар, баспалар және білім басқармасы мен білім министрлігінің өкілдері де жүйеге қосыла алады. Платформа кітапхана ақпаратына негізделген құжат айналымы жұмысын оңтайландырып, кітапхана қорын басқаруға мүмкіндік береді», - деп бөлісті жоба авторы.

Жаңа жүйе кітапханашылардың жұмысын автоматтандырып қана қоймай, «OQU» мобильдік қосымшасын ұсынады, ол қазақстандық оқушыларға әлемдік классиканы тек түпнұсқасында ғана емес, сонымен қатар қазақ тілінде де тегін оқуға мүмкіндік береді. Аталмыш қосымшада әр оқушы кез-келген кітапқа тапсырыс беріп, оның қорда бар-жоғын тексере алады.

«Qazaq mura» цифрлық кітапханасы-бұл-республиканың қалалары мен ауылдарындағы кітапхана инфрақұрылымының жетілмеген мәселелерін шешуге бағытталған. Нәтижесінде кітапхана қорының айналымындағы кітаптардың барлығының электронды нұсқасы  қолжетімді болады.  Бұл өскелең ұрпақты кітап оқуға ынталандырып, мәдени мұраның сақталуына да зор септігін тигізбек. Бүгінде бұл жүйеге Алматының бірқатар мектептері қосылды. Цифрландыру жобасы енді еліміздің басқа да аймақтарын қамтымақ.