СҚО-да су тарифін заңсыз қымбаттатқан монополист компания жазаланды
Өңір тұрғындары прокуратура көмегімен су бағасын төмендетті
Солтүстік Қазақстан облысының прокурорлары тұтынушылардың құқықтарын қорғады, деп хабарлайды Azattyq Ruhy.
СҚО прокуратурасының мәліметінше, Тимирязев ауданының Тимирязево ауылында талдау жүргізу кезінде жоғары тариф бойынша су үшін ақы алу фактісі анықталды.
«Табиғи монополиялар субъектісі «Табиғи монополиялар туралы» Заңның талаптарын бұза отырып, 2021 жылғы қыркүйектен 2022 жылғы тамызға дейін уақытша өтемдік тарифтің қолданылу кезеңінде тұрғындардан сумен жабдықтау қызметтері үшін 59,79 теңге/м3 орнына 88,45 теңге/м3 мөлшерінде ақы алған», - делінген ведомство хабарламасында.
Халық үшін баға 28,66 теңге/ м3 немесе бекітілген тарифтен 32% көп болған.
Сол сияқты, жоғары тариф бойынша қызметтер төлемі бизнес субъектілерінен, бюджеттік ұйымдардан және басқа тұтынушылардан да алынған.
«Монополист заңсыз әрекеттерден 5,8 млн теңге сомасында пайда тапқан. Аудандық қадағалау органының актісі бойынша облыстың табиғи монополияларды реттеу департаменті ҚР «Әкімшілік құқық бұзушылық туралы» кодексінің 164-бабы бойынша халық үшін су құнын м3 үшін 59,79 теңгеге дейін, ал басқа тұтынушылар үшін м3 үшін 524,34 теңгеге дейін төмендете отырып, уақытша өтемдік тариф енгізе отырып, айыппұл түрінде әкімшілік жауапкершілікке тартты», - делінген хабарламада.
Монополист қаражатты өтеуді төмендетілген тарифті қолдану арқылы 2023 жылғы 1 желтоқсаннан 2026 жылғы 30 қарашаға дейін жүзеге асыратын болады.
Азаматтардың құқықтарын қорғау мәселесі облыс прокуратурасының бақылауына алынды.
