ДДСҰ басшысы Қазақстанның медицина қызметкерлерін құттықтады

Дүниежүзілік денсаулық сақтау ұйымының Бас директоры Тедрос Гебрейесус Қазақстанның медицина қызметкерлерін кәсіби мерекелерімен құттықтады. ДДСҰ басшысының құттықтауы ҚР Денсаулық сақтау министрлігінің Instagram-дағы парақшасында жарияланды, деп хабарлайды Azattyq Rýhy.

«Жоғары мәртебелі, министр Ғиният, қымбатты әріптестер мен достар! Бүгін Сіздермен бірге ұлттық денсаулық сақтау қызметкерлері күнін атап өту мен үшін үлкен мәртебе. ДДСҰ атынан Абай ауданындағы өрт сөндіру кезінде орман шаруашылығының 14 қызметкерінің қаза табуына байланысты көңіл айтамын», - деді Дүниежүзілік денсаулық сақтау ұйымының Бас директоры Тедрос Гебрейесус.

Ол ержүрек орманшылар сияқты осындай батылдықпен денсаулық сақтау қызметкерлері де әр уақытта жиі тәуекелге баратынын баса атап өтті.

«Олар - мықты денсаулық сақтау жүйелерінің, әсіресе медициналық-санитарлық алғашқы көмектің басты нысаны. Алматы медициналық-санитарлық алғашқы көмек қозғалысының бесігі саналады. Дәл осы жерде көшбасшылар алғашқы медициналық көмекке «Баршаға денсаулық» саясатының негізгі элементі ретінде өз міндеттерін көрсетті. 40 жылдан кейін Астанада өткен конференция осы маңызды мақсатты айқындайды. Денсаулықтау сақтау қызметкерлерін қолдау ДДСҰ үшін бірінші кезектегі міндет болып табылады және біз сіздерді қолдауға әрдайым әзірміз», - деді ол.

Сондай-ақ ол денсаулық сақтау саласындағы кадр жетіспеушілігінен көші-қон, кәсіптік деңгейде жарақат алуға дейінгі күрделі проблемалар жағдайында нақты деректер мен дәлелденген стратегияларға сүйене отырып, барлық күш-жігерімізді үйлестіруіміз маңызды екенін де жеткізеді.

«Біз бірге денсаулық сақтау қызметкерлеріне сапалы білім мен дайындықты қамтамасыз етуіміз керек. Қауіпсіз еңбек жағдайлары, лайықты жалақы, тең мүмкіндіктер және лайықты құрмет таныту ләзім. Рақмет!», - деді  ДДСҰ Бас директоры.