Кәрім Мәсімов пен оның орынбасарлары жазаларын қауіптілігі орташа мекемеде өтейтін болды

Ұлттық қауіпсіздік комитетінің бұрынғы басшысы Кәрім Мәсімов пен оның орынбасарлары жазаларын қауіптілігі орташа мекемеде өтейтін болды, деп хабарлайды Azattyq Rýhy елордалық соттың баспасөз қызметіне сілтеме жасап.

«Апелляциялық инстанция бірінші сатыдағы соттың К.Мәсімовке, А.Садықұловқа және Д.Ерғожинге қатысты жазасын өтеу мекемесінің түрі бойынша қауіпсіздігі ең жоғарыдан орташа мекемеге ауыстырды. Қылмыстық кодекстің 6-бабына сәйкес, сотталғандардың жағдайын жақсартатын заңның кері күші бар және соттар оны қолдануы міндетті», - делінген елордалық соттың хабарламасында.

Үкімнің қалған бөлігі өзгеріссіз қалдырылды. Ол заңды күшіне енді.

Айта кетейік, Астана қаласының қылмыстық істер жөніндегі мамандандырылған ауданаралық сотының 2023 жылы 24 сәуірдегі үкімімен К. Мәсімов пен А.Садықұлов ҚР Қылмыстық кодекстің 175-бабының 1-бөлігі, 179-бабының 3-бөлігі, 362-бабының 4-бөлігі 3-тармағы бойынша кінәлі деп танылып, 18 және 16 жылға бас бостандығынан айырылған болатын. 

Д. Ерғожин ҚР Қылмыстық кодекстің 179-бабының 3-бөлігі, 362-бабының 4-бөлігі 3-тармағы бойынша кінәлі деп танылып, 15 жылға бас бостандығынан айырылды. М. Осипов ҚР Қылмыстық кодекстің 362-бабының 3-бөлігі бойынша 3 жыл мерзімге бас бостандығынан айырылды.