Балқаш тұрғындарын сусыз қалдырған апат: облыс әкімі қызметтік тергеу жүргізуді тапсырды
Балқаш қаласында 80 мыңға жуық тұрғын екі тәулікке жуық ауыз сусыз отырды
Қарағанды облысының әкімі Ермағанбет Бөлекпаев Балқаш тұрғындарын екі тәулікке сусыз қалдырған апатқа байланысты қызметтік тергеу жүргізуді тапсырды, деп хабарлайды Azattyq Rýhy облыс әкімдігіне сілтеме жасап.
Облыс басшысы болған оқиғаның себептерін анықтап, жағдай қайталанбау үшін барлық қажетті шараны қабылдауды талап етті.
Балқашқа жұмыс сапары барысында Ермағанбет Бөлекпаев апат болған жерге барды. Содан кейін қалалық мәслихат депутаттарымен кездесуде жағдайды талқылады.
«Балқаш су» басшылығы өзінің қабілетсіздігін көрсетті деп санаймын. Белгілі болғандай, қақпа клапаны осы уақытқа дейін судың астында болған. Неге тексерілмеген? Мекеме басшысының атқаратын лауазымына сәйкестігін қарастыруды тапсырамын. Қызметтік тергеу жүргізіңіздер. Жобаны көтеріңіздер, егер қателер болса, бәрін түзету керек. Барлығын екі рет тексеріңіздер. Әрекет етіңіздер!», – деді облыс әкімі.
Еске сала кетейік, Балқаш қаласында 80 мыңға жуық тұрғын екі тәулікке жуық ауыз сусыз отырды. Оған магистральды құбырдағы апат себеп болды.
