«Кейбір облыстарда жағдай нашар»: ІІМ білім мекемелеріндегі қауіпсіздіктің осалдығын айтты

Мемлекет басшысының білім беру ұйымдарында балалардың қауіпсіздігін қамтамасыз ету жөніндегі тапсырмасын орындау мақсатында Оқу ағарту министрлігі кешенді шараларды жүзеге асыруда. Бұл туралы ведомство басшысы Ғани Бейсембаев Үкімет отырысында мәлімдеді, деп хабарлайды Azattyq Ruhy,

Ғани Бейсембаевтың сөзінше, 2023 жылғы 1 наурыздағы жағдай бойынша  бейнебақылау жүйелерімен білім мекемелері 100% қамтылған. Ал жедел басқару орталықтарына 6 мыңға жуық білім ошақтары қосылған. Лицензияланған күзетпен 2 мыңға жуық, дабыл түймелерімен 2400-ден аса білім беру нысандары қамтылған.

Білім беру ұйымдарының қауіпсіздігіне толық тексеру жүргізу бойынша бірнеше мемлекеттік мекемелер мен қоғамдық ұйым өкілдерінен құралған 162 мониторингтік топ 20 өңірде жұмыс істеуде.

«Бүгінде мониторингтік топ 10 мыңнан аса білім беру ұйымдарының 7 мыңға жуығын қамтыды. Жұмыс наурыз айының соңына дейін аяқталып, нәтижесі Министрліктің алқалы отырысында қаралатын болады», - деді министр.

Өз кезегінде Ішкі істер министрі Марат Ахметжанов Төтенше жағдайлар министрлігімен бірлесіп, білім беру ұйымдарында кешенді тексеріс жүргізіп жатқанын мәлімдеді.

«Жедел басқару орталықтарына бейнекамераның тек 62% пайызы ғана шығарылған (немесе 2 санаттағы 6936 нысанның 4360-ы). Кейбір облыстарда жағдай одан да нашар. Мысалы, Батыс Қазақстан облысында – 24% пайыз (373-тен 91); Алматы облысында – 35% (немесе 425 мектептің 152-і), Ақтөбе облысында – 41% (немесе 404-тен 169-зы). Бұл өңірлерде халықпен кездесу барысында жалпы осы мәселені әкімдіктер алдында көтердім.  Бұл мәселеде – жүйелік проблема да бар. Бірқатар білім беру ұйымдары мен байланыс каналдары компаниялары арасында тіпті келісімшарт жасалмаған.Мемлекеттік сатып алу процедуралары «қағаз-бастылыққа» салынуда», - деді Марат Ахметжанов.

Бұл ретте Солтүстік Қазақстан облысында 201 мектеп бойынша мемлекеттік сатып алу мәселесі әлі күнге дейін аяқталмаған болып шықты. 

Заңнамаға сәйкес мемлекеттік сатып алу қорытындысы шыққанға дейін, күзет пен дабыл және басқа да қауіпсіздік жүйелерімен қамтамасыз ету мәселесі бойынша 2 айға дейін «бір көзден» келісімшарт жасауға мүмкіндік. Бірақ, ешкім бұл норманы қолданбайды.

Заң бойынша 700 адамнан асатын мектептерде лицензияланған күзет болуы керек. Бірақ, бүгінгі күні онымен мектептердің тек 84% пайызы қамтылған (1416 мектептің 1193-і).Ал, Солтүстік Қазақстан (42) мен Түркістан (61) облыстарында ешбір мектеп мұндай күзетке алынбаған. Ұлытау облысында – 9% пайыз ғана (22-ден 2). Қостанайда – 50% пайыз (59-дан 30).

«Іс жүзінде, мектептерді күзету кәсіби емес мамандарға, яғни қарапайым «вахтерларға» тапсырылған. Оларда мүмкіндік те жоқ, заңмен белгіленген жауапкершілік те жоқ.  Сондықтан, қауіпті заттар мен қаруды кіргізуге тосқауыл қояды деп үміттену – бос амал (пышақтар, кастеттер, қару-жарақ және т.б.)», - деді Ішкі істер министрі.