Қаңтар оқиғасына нақты баға беруге әлі де ерте – саясаттанушы

Саясаттанушы Қазбек Майгелдинов Мәжіліс отырысында талқыланған қаңтар оқиғасының қорытындылары туралы пікір білдірді, деп хабарлайды Azattyq Ruhy. 

«Бүгін Мәжілісте қаңтар оқиғасының бір жылдығына орай арнайы отырыс өтті. Отырыста Бас прокуратура мен Ішкі істер министрлігі тергеу амалдары бойынша негізгі қорытындыны жариялады. Бір жыл ішінде Бас прокуратура тарапынан тергеу амалдары бойынша бірнеше рет ресми мәлімдеме жасалды. Осыған дейін қаңтар оқиғасына қатысты қоғам тарапынан да көптеген көкейкесті сұрақтар қойылды», - деді ол.

Саясаттанушы атағандай, тергеу әлі жалғасып жатқандықтан ресми ақпаратты толық деуге болмайды.

«Бас прокурор айтқандай, заң бойынша бірқатар құпия іс тергеліп жатыр. Сот шешімі шықты. Алматыдағы заң бұзу мен құқық бұзу, құқық қорғау және әскерилердің өліміне қатысты қылмыстар бойынша шықты. Дегенмен қаңтар оқиғасына баға беру әлі де ерте. Себебі бұл Қазақстанның барлық өңірін қамтыған ірі оқиға болды. Әлі де объективті зерттеулер қажет», - деді Қазбек Майгелдинов.

Ол атағандай, 1 жыл ішінде жасалған тергеу мен зерттеу ісі өз мәресіне жетпеген.

«Қаңтар оқиғасына қатысты мемориалды кешен де қойылды. Ол – қаңтар оқиғасының тарихымыздағы символдық орнын бекіту. Ол жерге гүл шоқтарын апарып, еске алу мүмкіндігі бар. «Қаңтар оқиғасын ұмытуға тырысып жатыр» деген жаңсақ пікір. Билік бұл оқиғаны ұмытпай, оның қайта қайталанбауына әрекет жасап жатыр. Президент тарапынан гуманистік іс-шара ретінде мыңға жуық адамға рақымшылық та жасалды», - деді ол.

Саясаттанушы азаптаулар бойынша да мәлімдемелер жасалғанын айтты.

«Азапталдым» деп өз қылмысын жасыруға тырысқандар да жоқ емес. Осындай істің барлығын салмақты түрде зерделеп, әрі қарай зерттеу алдағы күннің еншісінде. Мәжіліс отырысында бір жылдық оқиғаның алғашқы нүктесі қойылды деп айтуға болады. Болашақта барлық іс тергеліп, шешім шыққан соң қаңтар оқиғасының тарихи бағасы беріледі деп ойлаймын», - деді Қазбек Майгелдинов.