Ақтөбеде «полиция» куәлігін сатып жүрген тұрғын ұсталды

Ақтөбеде «полиция» куәлігін сатушы ұсталды, деп хабарлайды Azattyq Ruhy ІІМ баспасөз қызметіне сілтеме жасап.

Ақтөбе қаласында облыстық полиция департаментінің өзіндік қауіпсіздік басқармасымен ішкі істер органдары қызметкерлерінің жалған қызметтік куәліктерін дайындау және сату бойынша қылмыстық әрекет тоқтатылды.

Анықталғандай, жергілікті тұрғын компьютердің, түрлі-түсті принтердің және ламинатордың көмегімен жалған полиция куәліктерін жасап, қарапайым азаматтарға сатқан.

«Оның пәтерін тінту кезінде кеңсе жабдықтарынан басқа ІІМ қызметкерлерінің куәліктеріне арналған жүзден астам мұқаба алынды. Күдікті жедел уәкілдің «корочкасын» сатқаннан кейін арнайы іс-шараларды өткізу кезінде ұсталды», - делінген хабарламада.

Қылмыстық іс қозғалды, күдікті жасап, сатып үлгерген жалған қызметтік куәліктерді анықтау және тәркілеу бойынша шаралар қабылданып жатыр.