Биыл Қазақстанда мұнай мен газ өндірісінің көлемі біршама азайған

Биылғы он ай ішінде Қазақстан экономикасының өсу қарқыны 2,5%-ды құрады. Бұл туралы Үкімет отырысында Ұлттық экономика министрі Әлібек Қуантыров мәлім етті, деп хабарлайды Azattyq Ruhy.

«Қаңтар-қазан айларында Қазақстан экономикасының өсу қарқыны 2,5%-ды құрады. Оның ішінде нақты сектордағы өсім 2,8%, қызмет көрсету саласында 1,6% құрады. Салалар арасында ауыл шаруашылығы, ақпарат және коммуникациялар, құрылыс, өңдеу өнеркәсібі, сауда, көлік және қойма шаруашылығында оң өсім байқалып отыр», - деді Әлібек Қуантыров.

Оның айтуынша, негізгі капиталдағы инвестицияның өсу қарқыны 6,7 пайызды құрады. Экономиканың негізгі салаларында өнеркәсіпке инвестициялар ағыны 4,1%-ға өссе, тау-кен өнеркәсібінде – 13,7%-ға, сондай-ақ ауыл шаруашылығында – 7,4%-ға, жылжымайтын мүлікпен операцияларда – 14,7%-ға, көлік пен қоймада – 8,5%-ға өсті.

Сондай-ақ өңдеу өнеркәсібі оң өсу қарқынын сақтап отыр. Осы жылдың қаңтар-қазан айларында өндіріс көлемі 4,3 пайызға өсті. Ал тау-кен өнеркәсібінде өндіріс көлемі 1 пайызға төмендеген.

Сонымен қатар газ өндіру – 1,5%-ға, мұнай өндіру – 2,5%-ға және басқа да пайдалы қазбаларды өндіру 9,9%-ға төмендеген.