Ақтөбе облысында балаларға арнап «Жанды сабақтар» іс-шарасы ұйымдастырылды

Соңғы кездері таным тұрғысында өзіндік орынға ие болған бастамалардың бірі – «Жанды сабақтар» республикалық жобасы

Жобаның басты мақсаты – жастарымыздың бойындағы патриоттық сезімін күшейту, сол сияқты еліміздің тарихына, ұлттық салт-дәстүріміз бен мәдениетімізге, құндылықтарына, аға буынның жетістіктеріне құрметпен қарау.

Балалардың ой-өрісін кеңейтуге, теорияны іс жүзінде бекітуге интерактивті экскурсиялар көмектеседі. Біз ауыл балалары үшін қалаға, ал қалада тұратын жасөспірімдерге ауылға арнап сапар ұйымдастырамыз.

Облыстық кәсіпкерлер басқармасына қарасты туристік ақпараттық орталық (ТАО) қызметкерлері кәсіби гидтердің көмегі арқылы Ақтөбе облысының әр тұсынан келген 2400 балаға және олардың ұстаздарына арнап арнайы «жанды сабақтар» ұйымдастырып, тимбилдингтер өткізді.

Нақты айтар болсақ, 9 қазан күні Темір ауданының оқушылары үшін Ақтөбе облысындағы Ойыл ауданында арнайы «Жанды сабақтар» өткізілді.

Сапар барысында балалар Кеңес Одағының Батыры Әлия Молдағұлованың мемориалдық кешенін, Абат Байтақ қорымында, XIV-XV ғасырдан қалған тарихи ескерткіштер мен Түйетөбе мемориалын, атақты «Қасқыр сарқырамасын» аралап, жел электр стансасы мен панталы емшаралар қабылдайтын орталықтың жұмысымен танысты.

Сол сияқты оқушылар әйгілі «Керуен Сарай» кешенінде барып, Көкжар мешітіне тоқтады. Жергілікті ұйымдастырушылар жас саяхатшыларды Шығанақ Берсиев атындағы аудандық аймақтану мұражайына алып барды.

Көкжар жәрмеңкесі «Керуен Сарай» тарихи-архитектуралық кешенінің құрамдас бөлігі болып саналады. ХІХ ғасырда қызыл кірпіштен қаланған, ұзындығы 400 метрге жететін бес сауда орны мен мешіттің ғимараты бүгінде мұра болып қалды. Сапар аяғында оқушылар жұлын, жүйке және омыртқа ауруларын құм ванналары арқылы емдейтін Барқын құмына барды. Табиғаты көркем бұл аймақта әсем шоқ қарағайлы орман бар.

Бұл «Жанды сабақтар» балалар үшін нағыз таным сабағы болды.