Мемлекет басшысы Нұрлан Қоянбаевтың патриоттық челленджін қолдап, желіде пікір қалдырды
Отандық продюсер Президенттің қолдауына өз ризашылығын білдірді
Мемлекет басшысы Қасым-Жомарт Тоқаев желіде 2020 жылы 25 маусымда жарияланған Нұрлан Қоянбаевтың Қазақстан туымен байланысты челленджін қолдап, пікір қалдырды. Президент Instagram-дағы продюсер жарияланымы астына пікір жазып қалдырған, деп хабарлайды Azattyq Rýhy.
"Көк туымыз мәңгі желбірей берсін!", деп жазды Президент желіде.
Еске сала кетейік, отандық продюсер Нұрлан Қоянбаев 2020 жылы 25 маусымда әлемдік рекорд орнату үшін Instagram парақшасында Қазақстан туының суретін жариялап, ерекше челленджді іске қосқан болатын. Ондағы мақсат - пікір жинаудан әлемдік рекорд орнату. Бүгінгі таңда Қазақстан туының суреті бар Instagram-дағы бұл жарияланым 13 млн 894 мың 392 пікір жинап үлгерген.
Нұрлан Қоянбаев Президенттің қолдауына өз ризашылығын білдіріп, желіде жауап қатты.
"Достар, біздің жобамызды Президент қолдады! Біздің бастаған жобамыз - әлеуметтік желіде де бір ел, бір күш екеніміздің айғағы. Көк туымыз желбірей берсін! Президентімізге #respect !!!", деп жазды ол желіде.
