Жетісайдағы өртенген «Күлпаршын» базарын қайта қалпына келтіру жұмыстары басталды

Жетісайдағы «Күлпаршын» базарын қайта қалпына келтіру жұмыстары басталды, деп хабарлайды Azattyq Rýhy.

Түркістан облысы Өңірлік коммуникациялар қызметінің мәлімдеуінше, өрт қалдықтарын тазалау жұмыстарына Жетісай ауданының тұрғын үй-коммуналдық шаруашылығы жолаушылар көлігі, автомобиль жолдары және тұрғын үй инспекциясы бөліміне қарасты «Жетісай қызмет» МКК қызметкерлері мен жалдамалы жұмысшылар, ерікті азаматтардан 100-ге жуық адам, 10 шақты техника жұмылдырылған.

Одан бөлек, базарда сауда жасаушы кәсіпкерлер де асарға көмекке келуде.

Өмірзақ Шөкеев бүгін «Күлпаршын» базарына келіп, жағдаймен танысты.

«Ешкім көмексіз қалмайды. Базар басшылығы кәсіпкерлермен келіссөз жүргізіп, жанған тауар шығынын заң аясында өтеу керек. Бірінші мәселе, базарды қалпына келтіріп, тездетіп іске қосу қажет. Ол үшін жақын маңдағы аудандардан бригадалар алдырамыз. Әр секторға жөнделетін базар қатары бекітіледі. Әр павильонды 6-7 топқа бөліп, кәсіпкерлер мәселесін оңтайлы шешуді қадағалаймыз», - деді өңір басшысы.

Қазіргі таңда зардап шеккен кәсіпкерлерді басқа сауда орындарына уақытша орналастыру бойынша «Қарақай» сауда базарына және «Күлпаршын» базарының өрт шалмаған орындарына жайғастыру жұмыстары жүргізілуде.