Жаңа оқу жылында мектеп бағдарламасына қандай өзгерістер енді

Орталық коммуникациялар қызметінде өткен брифингте жаңа оқу жылында мектептің оқу бағдарламаларына енгізілген бірқатар өзгеріс туралы кеңінен айтылды, деп хабарлайды  Azattyq Ruhy. 

Оқу-ағарту бірінші вице-министрі Шолпан Каринованың мәліметінше, ведомство елімізде мемлекеттік тілде білім алатын 1-сыныптарға тек қазақ тілін, орыс тілінде білім алатын 1-сыныптарға мемлекеттік тіл мен орыс тілін ғана оқыту туралы шешім қабылдады. Қазақ тілінде білім беретін мектептерде 2-сыныптан бастап орыс тілін оқыту басталады. Ал ағылшын тілі барлық мектепте үшінші сыныптан бастап оқытылады.

«Талдаулар мен сараптамалардың нәтижелері бойынша 1-сынып оқушысына бірден үш тілді үйрену қиын екені анықталды. Бала алдымен ана тілінде оқып, жаза білуі керек. Сондай-ақ балаларды ерте кәсіби бағдарлау мақсатында 1-сыныпқа «Еңбекке баулу» және «Бейнелеу өнері» пәндері «Көркем еңбек» пәнінің орнына жүргізілетін болады», - деп атап өтті Шолпан Каринова.

Оның айтуынша, 1-4 сынып оқушыларына мектептерде шахмат ойнын үйрету ұсынысы жасалды.

«Жаһандық құзыреттілік» факультативтік курсы бойынша оқыту жалғасатын болады. Бұл пән биыл 5-11 сыныптар үшін міндетті курс болып табылады. Курста «Адалдық және этика», «Экологиялық мәдениет», «Азаматтық», «Тіршілік қауіпсіздігінің негіздері», «Медиасауаттылық және қаржылық сауаттылық» модульдері қамтылған», -  деді Ш. Каринова.