1 қыркүйекте Қазақстан мектептеріндегі салтанатты іс-шаралар қалай өтеді
Биыл барлығы 3,6 миллион оқушыға 7,6 мың мектеп есігін айқара ашады
1 қыркүйекте Қазақстанның барлық мектебінде Білім күніне арналған салтанатты жиын өтеді, деп хабарлайды Azattyq Ruhy.
ҚР Білім вице-министрі Шолпан Каринова салтанатты іс-шараны өткізу форматын және қатысушылардың құрамын білім беру ұйымдары өздері белгілейді.
«1 қыркүйекте барлық мектепте «Білімге ұмтылу, еңбексүйгіштік және отансүйгіштік» тақырыбында сынып сағаты өтеді. Биыл барлығы 3,6 миллион оқушыға 7,6 мың мектеп есігін айқара ашады, 384 мың мұғалім сабақ береді», - деді Шолпан Каринова Орталық коммуникациялар қызметінде өткен баспасөз мәслихатында.
Вице-министр оқу жылы 31 мамырға дейін 36 аптаға созылатынын еске салды.
«Жаздың алғашқы күнінен бастап студенттер дәстүрлі түрде жазғы демалысқа шығады. Сәйкесінше, жаз айларында балалар толығымен демалады. Жалпы, оқу жылында балалар 4 рет демалады. Демалыс уақытына қатысты ешқандай өзгеріс жоқ. Жазғы демалыс пен демалыс күндерін есепке алғанда, оқу жылында балалар 192 күн демалады, ал оқу күндерінің саны - 173 күн », - деді Ш. Каринова.
