Түркістан облысында ер адам әйелін ұрып, бес баласымен бірге үйінен қуып шықты

Түркістан облысы Сарыағаш қаласындағы отбасылардың бірінде болған жандалдың салдарынан көпбалалы ана балаларымен далада қалды. Бұл туралы журналист Гүлмира Әбіқайдың Instagram парақшасын жарияланған видеода айтылған, деп хабарлайды Azattyq Ruhy.

Кадрдан әйелдің қайын атасы келініне қол көтеріп, үйден қуып шығуға әрекет жасап жатқаны байқалады. Сондай-ақ, балалардың үрейленіп, қорыққандарынан жан дауыстары шығып жылап тұрғандарын көруге болады. Ал жолдасы әйелдің киім-кешектері мен жастықтарын жинап далаға шығаруда.

Есімін Жұлдыз деп таныстырған келіншектің күйеуімен отасқанына 8 жыл болған. Араларында 5 баласы бар. Айтуынша, жолдасы оның көзіне шөп салып, артынша отбасында жандал туындаған.

«Соңғы екі жылда күйеуім өзінен үлкен әйелмен жүріп, мені бес баламмен тастап кетті. Онымен қоса, менің ата-анам жоқ екенін біле тұра, тұрып жатқан үйімнен бес баламмен қайын атам екеуі ұрып, қуып шықты. Содан балам стресс алып, қазір ауруханада жатырмыз. Ертең ауруханадан шыққаннан кейін баратын жерім жоқ. Оқу жылы жақындап қалды, балаларымды қайда жайғастырарымды білмеймін. Маған көмек берулеріңізді сұраймын», - дейді келіншек өзі түсірген видеоүндеуде.