ШҚО-да дрон арқылы түрмеге телефондарды кіргізбек болғандар іздестіріліп жатыр

ШҚО-да дрон арқылы түрмеге телефондарды кіргізбек болғандар іздестіріліп жатыр, деп хабарлайды Azattyq Rýhy Polisia.kz-ке сілтеме жасап.

Шығыс Қазақстан облысы бойынша Қылмыстық атқару жүйесі департаментінің ОВ-156/20 колониясының қызметкерлері смартфондары бар дронды және скотчпен оралған түйіншекті колония маңындағы бұзылған ғимараттың ішінен тауып алды.

Тәртіп бұзушылар колония жанындағы қараусыз қалған ғимаратқа тығылып, мекеме аумағына дронның көмегімен тыйым салынған заттарды тастауға дайындалған. Алайда қызметкерлерді байқаған тәртіп бұзушылар өз аппараттарын алуға үлгермей, қашып үлгерген.

«Аталған факті бойынша Өскемен қаласының Полиция басқармасының жедел-тергеу тобы шақырылды. Түйіншекті ашу кезінде есірткіге ұқсас зат табылған. Сондай-ақ, екі телефон және басқару пульті бар дрон табылды. Сараптама тағайындалды», – деді департаменттің ресми өкілі Салтанат Ожиканова.