12 сағатқа рейсті кешіктіргені үшін Fly Arystan әуе компаниясы 3 млн теңге айыппұл төлейді

Азаматтық авиация комитеті рейстерді кешіктірген әуе компанияларын жауапқа тартуды жалғастырып жатыр. Бұған дейін Air Astana компаниясы ірі көлемде айыппұл арқаласа, енді осы «Эйр Астана» компаниялар тобына кіретін Fly Arystan әуе компаниясы да 3 млн теңге көлемінде айыппұл төлейтін болды. Комитет мұны жолаушылардың құқығы бұзылғанымен байланыстырды.

«Тергеу барысында 2022 жылдың 16 шілдесінде "Эйр Астана" компаниялар тобына кіретін "Fly Arystan" бөлімшесінің Алматы-Атырау бағыты бойынша КС-7202 рейсі 12 сағат 9 минутқа кешіктірілгені анықталды. Ұшуды күткен кезде осы рейстің жолаушыларына Қазақстан Республикасының әуе кеңістігін пайдалану және авиация қызметі туралы Қазақстан Республикасы Заңының 86-бабының 1-бөлігінде көзделген қызметтер, атап айтқанда, қонақ үйде тұру бойынша қызметтер тиісінше ұсынылмаған», - деп атап өтті Азаматтық авиация комитетінің төрағасы Талғат Ластаев.

Осыған байланысты, 4 тамызда авиакомпанияға қатысты Қазақстан Республикасының Әкімшілік құқық бұзушылық туралы Кодексінің 567-бабының 2-бөлігі бойынша Әкімшілік құқық бұзушылық туралы хаттама жасалып, оған сәйкес авиакомпанияға 1 000 АЕК (3 063 000 тг.) мөлшерінде айыппұл салынды.

«Бұл "Эйр Астана" әуе компаниясы тобының рейс кешіктірілген кезде жолаушылар құқығының бұзылуы себебінен өткен айда жалпы сомасы 12 млн теңгеден асатын әкімшілік жауапкершілікке тартудың төртінші жағдайы. Комитет заңнамада көзделген міндеттемелерді орындамаған жағдайда авиатасымалдаушыларды әкімшілік жауапкершілікке тарту үшін қажетті шаралар қабылдайды», – деді Талғат Ластаев.