ШҚО-да қайықтың суға батуына қатысты тергеу басталды

Бұқтырма су қоймасында 24 адам мінген қайықтың суға батып кету дерегі бойынша сотқа дейінгі тергеу амалдары басталды, деп хабарлайды Azattyq Ruhy.

«ҚР Қылмыстық кодекстің 344-бабы 1-бөлігі ("Темiржол, әуе, теңіз немесе өзен көлiгi жүрісі немесе оларды пайдалану қауiпсiздiгi қағидаларын бұзу") бойынша сотқа дейінгі тергеу-тексеру амалдары басталды. Тиісті сараптама жүргізіліп жатыр. Кеменің суға бату себептері анықталады», - деп көрсетті ШҚО Полиция департаментінің баспасөз қызметі.

Естеріңізге саламыз, жексенбі күні Шығыс Қазақстан облысындағы Бұқтырма су қоймасында 24 адам мінген қайық батып кеткен болатын.