Түркістан облысында ойынханаға ойыншық тапаншамен шабуыл жасағандар ұсталды

Azattyq Rýhy

Қазіргі уақытта соталды тергеу амалдары жүргізіліп жатыр

Түркістан облысында ойынханаға ойыншық тапаншамен шабуыл жасағандар ұсталды
Түркістан облыстық ПД баспасөз қызметі

Түркістан облысында ойынханаға ойыншық қарумен қарақшылық шабуыл жасағандар ұсталды. Бұл туралы Түркістан облысы ПД баспасөз қызметі мәлім етті, деп хабарлайды Azattyq Rýhy.

"7 шілдеде таңғы сағат 4:58 шамасында, "102" пультіне облыс орталығында орналасқан ойын клубының кассирі хабарласты. Жәбірленушінің айтуынша, бетперде таққан белгісіз біреулер ойынханаға қарақшылық шабуыл жасаған. Яғни бетперде киген, қолында қаруы бар екі ер адам кіріп, айтқан талаптарын орындамаса дене жарақатын саламыз деп қорқытқан. Одан ары жас жігіттер арам ойын іске асырып, ойынханадағы касса жәшігін бұзып, ішінен 350 000 теңге ақшаны алып, ізін суытқан", - деді Түркістан облысы ПД бастығының орынбасары полиция полковнигі Құрманбек Сахов.

Дерек ҚР ҚК-нің 192-бабы 2-бөлігі "Қарақшылық" бойынша тіркелген.

Түркістан облысы Криминалдық полиция басқармасы мен Түркістан қалалық полициясының тәжірибелі қызметкерлерінен арнайы жедел-тергеу тобы құрылған. Жақын маңдағы аумақтар қаралып, ықтимал куәлардан жауап алынды. Бейнебақылау камералары тексерілген. Жан-жақты жедел-іздестіру іс-шаралары нәтижесінде екі тәулік ішінде күдікті ретінде екі тұрғын анықталып, ұсталған.

"Тергеу барысында жас жігіттер қылмыс жасағанын мойындап, ұрланған ақшаны жеке қажеттіліктеріне жұмсағанын жеткізді. Сонымен қатар, күдіктілердің бірі қолындағы тапанша ойыншық екенін, оны қала базарларының бірінен сатып алғанын айтты. Ал қарақшылық шабуыл жасағаннан кейін ол қаруды дәретханаға тастаған. Ойыншық тапанша заттай дәлел ретінде тәркіленіп алынды", - деді Құрманбек Сахов.

Қазіргі уақытта соталды тергеу амалдары жүргізіліп жатыр. Күдіктілер қамауға алынды.

×
Бұл желілік ресурстың ақпараттық өнімдері 18 жастан асқан адамдарға арналған.