Мораторий аяқталған соң коммуналдық қызмет бағасы қымбаттайды − Ұлттық банк

Мамыр айындағы инфляция 14%-ға жетті, деп хабарлайды Azattyq Ruhy тілшісі.

Айлық инфляция сәуірде 2%-ға, наурызда 3,7%-ға және мамырда 1,4%-ға өскен. Баяулау байқалғанымен, жалпы мәнде инфляция жоғары деңгейде сақталып отыр.

«Оның ішінде жылдық мәнде тамақ өнімдері бағасының инфляциясы 19%-ға өсті. Азық-түлікке жатпайтын тауар бағасы 11,1-ден 11,9%-ға дейін, ақылы қызметтердің инфляциясы 8,9-дан 9,1%-ға дейін өсті. Ұлттық банк 2022 жылдың соңында инфляция 13-15% деңгейінде болады деп болжайды», - дейді Ұлттық банк төрағасы Ғалымжан Пірматов.

Оның айтуынша, азық-түлікке жатпайтын тауарлар бағасының өсуі біршама жеделдейді деп болжанып отыр және жанар-жағармай бағасы реттеледі. Реттелетін коммуналдық қызметтер бағасы мораторий аяқталғаннан кейін қымбаттайды, сондай-ақ жоғары инфляциялық күтулер аясында нарықта көрсетілетін қызметтер бағасы өседі.