Таразда гараждың артынан қару-жарақ қоймасы табылды

Полицейлер жедел іздестіру шаралары кезінде Тараз көшелерінің бірінде гараждың артынан қару-жарақ қоймасын тапты. Бұл туралы Жамбыл облыстық ПД мәлім етті, деп хабарлайды Azattyq Rýhy.

Департамент мәліметінше, 8 патроны бар "ПМ" тапаншасы, револьвер, 12 калибрлі "ИЖ" маркалы тегіс ұңғылы мылтық, "LSG-80" жарық-шу гранатасы, 5,45 мм калибрлі патрондары бар металл жәшік (барлығы 2016 дана) тәркіленді. Сот-баллистикалық сараптама тағайындалды.

Сондай-ақ, полицейлер тағы бір қару-жарақ арсеналын анықтаған. Атап айтқанда, ТТ тапаншасы, иір ойықты қару, тегіс ұңғылы қару, жарық-шу гранатасы, дыбыс -шу гранатасы, 12 калибрлі 5 патрон, 9 мм ПМ-нің 36 патроны, 5,45 мм калибрлі 19 патрон, ТТ-нің 7,62 калибрлі 3 патроны, 1 бронжилет тәркіленді.

Полиция департаменті қарудың, оқ-дәрілер мен арнайы құралдардың орналасқан жері туралы хабарлаған немесе оларды полицияға өз еркімен тапсырған адам қылмыстық және әкімшілік жауапкершілікке тартылмайтынын еске салды. Анонимділікке кепілдік беріледі.