Криштиану Роналдудың Instagram-дағы жазылушылар саны 200 миллионнан асты

Туриндік Juventus шабуылшысы Криштиану Роналдудың Instagram-парақшасына жазылғандар саны 200 миллионнан асты. Әлеуметтік желідегі статистиканы Trackalytics жүйесі жүргізеді.

Осылайша португалдық футболшы Instagram желісінде 200 миллиондық межеге жеткен алғашқы қолданушы ретінде тарихта қалды.

Былтыр қаңтар айында Роналдудың Instagram-дағы жазылушылар саны 150 миллионға жеткен еді. Бір жыл ішінде оған тағы 50 миллион қолданушы жазылды. Былтыр қазан айында Buzz Bingo порталы футболшының әлеуметтік желі арқылы табатын табысын есептеген болатын. Роналду Instagram-дағы бір жарнамасы үшін 48,66 млн долларға дейін табыс табады екен.