Атырауда 106 айыппұлы бар көлік жүргізушісі анықталды

Атыраулық полицейлер 3 млн теңгеге жуық 106 айыппұлы бар көлікті анықтады. Автомобиль Грузия елінде тіркеуде тұрған, деп хабарлайды Azattyq Rýhy.

«6 маусым күні сағат 12:00 Атырау қалалық полиция басқармасының Жедел басқару орталығының қызметкерлері Грузия елінде тіркелген Toyota Highlander автокөлігінің төленбеген айыппұлы бар екенін анықтап, патрульдік полиция қызметкерлеріне анықтама берген. Өз кезегінде қала көшелерінің бірінен Toyota Highlander автокөлігінің жүргізушісі тоқтатылып, аталған автокөліктің 2 млн 937 мың 417 теңге төленбеген 106 айыппұлы бар екені анықталды. Сондай-ақ, аталған автокөліктің сақтандыру жүйесінде де ақпараттары жоқ екендігі анықталды», - деп көрсетті Атырау облыстық Полиция департаменті.  

Автокөлік иесіне ҚР ӘҚБтК-нің 230 бабы 2 бөлігімен хаттама толтырылып, көлігі арнаулы тұраққа қойылды.

Көлік жүргізушісі аталған көлікті 2-3 күн бұрын сатып алғанын және 106 айыппұлы барын білмеген.