Өскеменде сауда үйіне жарылғыш зат қойылғаны туралы жалған хабарлама берген ер адам сотталды

Azattyq Rýhy

Терроризм актісі туралы көрінеу жалған хабарлау бойынша ісі сотқа жолданған

Өскеменде сауда үйіне жарылғыш зат қойылғаны туралы жалған хабарлама берген ер адам сотталды
Фото ашық дереккөзден

Осы жылдың 2 қаңтарында Өскемен қаласы ПБ Үлбі ПБ «102» жедел арнасына белгісіз жігіт қоңырау шалып, қаланың сауда үйлерінің бірінде бомба қойылғаны туралы жалған хабарлама берді. Бұл туралы Azattyq Rýhy өңірлік ПД баспасөз қызметіне сілтеме жасап хабарлайды.

Ақпаратты алғаннан кейін дереу оқиға орнына мамандандырылған қызметтер жеткен. Тексеруден кейін қоңырау жалған болып шықты.

Тәртіп сақшылары телефон нөмірі бойынша қоңырау шалған жігітті жедел анықтап, ұстады. Ол облыс орталығының 21 жастағы тұрғыны болып шықты, куәландыру нәтижесіне сәйкес «орташа» дәрежедегі масаң күйде болған.

Аталған факті бойынша ҚР ҚК-нің 273-бабы бойынша сотқа дейінгі тергеу жүргізіліп, іс сотқа жолданды. Осы жылдың 24 наурызында аталған жігітке 3 жылға бас бостандығын шектеу жазасы тағайындалды. 

Осы жылдың 3 айында ғана полиция қызметкерлері басқа арнайы қызметтермен бірлесіп осындай 4 шақыртуды тексерген, олар тексеру барысында жалған болып шықты және ақпарат расталмады.

Полиция департаменті қоғамдық резонанс пен ықтимал салдарларды ескере отырып, мұндай құқық бұзушылықтар үшін ҚР ҚК-нің 273-бабы (Терроризм актісі туралы көрінеу жалған хабарлау) бойынша қылмыстық жауапкершілік көзделгенін ескертеді, оның санкциясымен 5 жылға дейін бас бостандығынан айыру жазасы көзделген.

×
Бұл желілік ресурстың ақпараттық өнімдері 18 жастан асқан адамдарға арналған.